話說今日同班同事去大家樂食Lunch，咁食食下有個男人搭枱，咁我地又無咩所謂，繼續吹水。
我同同事講左一句:「呵欠~返去又係坐!實悶死我!」
點知坐喺隔離個男人反應好大，語氣心腸咁同我講叫我小心啲講野。我見佢好似想R水吹咁，就陪佢下，問佢做咩咁講，佢就分享左個C先生嘅故事比我地聽。
有一日，C先生同屋企人去西貢菠蘿輋游水，游完水成班一齊行番上岸而C先生行最後。
行到去膝頭哥咁高嘅水左右，前面啲人都仲有同C先生講野，講講下野之際，前面啲人發覺冇左C先生把聲，一擰轉頭望，Ｃ先生突然人間蒸發左!!!
後來報警叫埋水鬼隊搜索，包括水底及石隙，但完全冇發現。
落口供時阿sir問有冇聽到Ｃ先生叫或者類似石頭掉落水嘅聲，在場人士話根本幾秒前都仲同C先生有問有答，亦聽唔到任何大物件跌落水嘅聲......如是者，過左一星期，而C先生仍然音訊全無。
C先生屋企人好想知個仔去左邊，咩方法都試，包括問米。
結果得出C先生以下"回應":
"佢捉實我條頸唔比我上黎...比我返上去啦..."
聽到依度，我同事覺得寒寒地唔想聽落去就去左廁所，而我都比對方吊起左條癮，就叫佢繼續講。而個男仔就繼續講落去......
C先生屋企人懷疑C先生仲喺海裡面，於是再次搵水警幫手，由於水警已經搵左接近一星期，但都係無結果，所以決定放棄搜索。
而C先生屋企人求左好耐，水警最後願意搜索多最後一次。C先生屋企人去之前已經問左人，帶哂香燭溪錢西瓜等等物品。經過水警搜索依然遍尋不獲，C先生屋企人已經非常絕望，唯有試多次不問蒼天問鬼神。
C先生年老嘅爸爸點左香，然後跪喺海灘度向住個海講: 「求求你地，比返個仔條屍我，當可憐下我呢個七老八十啦!」
之後就灑溪錢，掉西瓜落海。C先生屋企人要求水警等多陣，水警話破例只可以等一個鐘，過左唔知幾耐......突然有個水警嗌:「喂!師兄!有料到!」水警們即刻飛隻艇出去，C先生條發漲左嘅屍終於浮左上黎，而頸上面纏住一大堆海草!
嗰陣埸面幾混亂，當聽到「喂!師兄!有料到!」呢句野已經攬住啲細路唔比佢地睇，之後好多人都喊同走黎走去，又將班細路趕上岸上返車走.......
事後幾位一齊同C先生去游水嘅在場人士回憶起一件事:
當日，佢地其實搵左好耐好耐都搵唔到菠蘿輋海灘入口，原本打算放棄改地點。但係呢個時候，C先生講左一句說話 :「搵唔到條路我條氣一定唔順，我死都要搵到去海灘條路呀!」
果然，冇幾耐之後就由C先生搵到條通去海灘果條“死"路。
之後個男人好認真咁奉勸我一句:「唔好成日死死聲，特別喺郊外嘅時候!」
聽到依度我心都寒左，依個時侯我同事都返左黎，我即刻話:「喂!依單野堅恐怖!你無聽走寶!」正當我想問個男人點解知得咁清楚時侯，但係我轉頭一望，已經唔見左個男人。
而我同事一臉疑惑咁問:「邊單呀?」
我呆呆咁地講:「頭先同我地搭枱個男人呀!佢講左C先生個故仔比我地聽!」
我同事就掛住玩手機無理我，邊玩邊講:「鬼有人同你搭枱咩!」
我見到佢嘅反應咁，似乎認真。同時間我發現地下有灘水由後面慢慢流過黎......我慢慢......慢慢轉身一望......
Search